🕋 Tawbah aur Wazahat – Fakeer Sirajuddeen Razvi ki Taraf se Ek Zaroori Baat
Main ne apne blog ya kisi social media platform par jitni bhi post likhi hain, agar likhne mein mujhse kahin koi galti ho gayi ho, to main Allah se sachchi tawbah karta hoon.
Agar maine kisi doosre shakhs ki post copy karke share ki ho aur usmein koi gair iraadi khata ho gayi ho jo mujhe samajh nahi aayi, to us se bhi main Allah se maafi maangta hoon.
Agar maine kisi aise Aalim-e-Deen ka bayan ya post share kiya ho jo pehle Haq par tha lekin baad mein gumrah ho gaya, to main us Aalim ko usi waqt tak Aalim samajhta hoon jab tak wo Haq par tha. Uske baad jo Shariat ka hukm hai, main usi par raazi hoon.
Aur agar maine kisi aise shakhs ka bayan ya taqreer share ki ho jo pehle se hi Maslak-e-Ahl-e-Sunnat ke khilaaf tha lekin mujhe us waqt iski maloomat nahi thi, to us se bhi main Allah se tawbah karta hoon.
Astaghfirullah Rabbi min kulli zambiyun wa atubu ilayh
Laa ilaaha illallahu Muhammadur Rasoolullah (Sallallahu Alaihi Wasallam)
---
📌 Ek Zaroori Wazahat
Agar maine apne blog ya social media par kisi aise shakhs ke liye “Huzoor”, “Hazrat”, ya doosre izzat waale alqaab istemaal kiye ho jo baad mein gumrah ho gaya, to wo alqaab sirf us waqt ke liye the jab tak wo Haq par tha. Aaj wo izzat ya alqaab us shakhs ke liye nahi hai. Log usse koi hujjat ya daleel na banayein.
---
❓ Aakhir Aise Logon ke Bayanat Kyun Nahi Hataye Gaye?
Is silsile mein log sawal kar sakte hain ke jab aise log gumrah ho gaye to unke bayan blog se hata diye jaane chahiye the?
To iski wajah ye hai:
Ye blog maine bade mushkil se tayar kiya hai.
Puri tarah saaf karna asaan nahi hai.
Kal ko aur bhi log badal sakte hain, to fir kitno ka hataya jaye?
Isliye logon se guzaris hai ke sirf unhi bayanaat ya posts ko padhein jo Maslak-e-Ahl-e-Sunnat Alahazrat ke mutabiq hoon, aur kisi gumrah shakhs ko hujjat na banayein.
---
🤲 Dil Azari aur Dua ki Darkhwast
Agar meri kisi baat ya post se kisi sachche Sunni bhai ya behan ka dil dukh gaya ho, to main unse dil se maafi chahta hoon.
Ya Allah!
Saare pakke Sunnion ko maaf farma.
Humein Imaan par zinda rakh, Imaan par hi wafat de.
Huzoor ﷺ, Aapke Habib ﷺ, aur Aapke Waliyon ki mohabbat humare dilon mein daal de.
Aur unke dushmanon se dushmani rakhne ki toufiq ata farma.
Humein Maslak-e-Alahazrat par qaim rakh.
Nafs ke humlon se bacha.
Ulama-e-Haq ko salamat rakh, unki hifazat farma.
Aur humein unke saath Haq par qaim wa daayim rakh.
Ameen summa Ameen.
– Fakeer Mohammad Sirajuddeen Siraj Razvi
-
