Khutba-e-Jumma Ka Adab Aur Sunnat Namazon Ka Hukm
Jab Khutba shuru ho jaye, to kya sunnat namaz padhi ja sakti hai?
Jawab: Nahi. Jab Arabic khutba shuru ho jaye, to us waqt sunnat ya nafl namaz padhna makrooh-e-tahreemi hai. Khutba, Jumma ki namaz ka hissa hai, isliye us waqt sirf khamoshi se khutba sunna farz hai.
Qur'an ka hukum:
"Wa iza quri-al Qur’anu fastami‘oo lahoo wa ansitoo la‘allakum turhamoon."
(Surah A'raaf, Ayat 204)
"Aur jab Qur’an padha jaye to usko ghoro se suno aur chup raho, taake tum par reham kiya jaye."
(Tarjuma: Kanzul Iman)
Yeh aayat jumla Quran ke liye hai, lekin is se fuqaha ne yeh bhi samjha ke khutba ke waqt bhi sunn-na aur khamosh rehna wajib hai.
Hadees Shareef:
Rasoolullah (sallallahu alaihi wasallam) ne farmaya:
"Jisne Jumma ke din khutba ke dauraan apne saathi se 'chup raho' kaha, usne bhi laghuw (bekaar baat) ki."
(Sahih Muslim: Hadith 857)
Agar kisi ko "chup raho" kehna bhi guneh hai, to sochiye us waqt baat karna, ya sunnat padhna kaisa amal hoga?
Ala Hazrat Imam Ahmad Raza Khan (rahmatullah alaih) farmate hain:
"Jab khatib minbar par baith jaye aur azaan shuru ho, to us waqt se le kar khutba khatam hone tak bolna, salaam karna, jawab dena, tasbeeh padna, hatta ke sunnat ya nafl padhna bhi makrooh-e-tahreemi hai. Us waqt sirf khutba sunna farz hai."
(Fatawa Razaviyya, Jild 8, Safha 320)
Khutba sunne ka tarika kya hai?
- Jab Arabic khutba shuru ho jaaye to Tashahhud ki tarah baith jayein, dono haath raanon par, aur khamoshi se sunna shuru kar dein.
- Jab Imam sahab "Innallaha wa malaikatahu..." padhein, to dil hi dil mein Durood Shareef padhein, zubaan se nahi.
- Dono khutbon ke darmiyan, jab Imam sahab thodi der ke liye baithte hain, us waqt dua maqbool hoti hai, to chupke se dil hi dil mein dua karein.
Urdu Bayan aur Arabic Khutba ka farq samajhna zaroori hai:
- Urdu me jo bayan hota hai, wo khutba nahi hota, balki waaz aur naseehat hoti hai.
- Aksar masajid me Urdu bayan ke baad waqt diya jata hai sunnat padhne ke liye, us waqt sunnat padh sakte hain.
- Magar jaise hi Arabic khutba shuru ho, us waqt na sunnat padhein, na tasbeeh, na salaam, sirf khutba sunain.
Behtareen Amal:
- Jumma ki namaz ke liye waqt se pehle masjid pahunch jaayein.
- Pehle chaar sunnat-e-muakkadah ada kar lein.
- Phir sukoon ke saath Urdu bayan sunein.
- Jaise hi Arabic khutba shuru ho, tashahhud ki soorat me baith jaayein aur khamoshi ikhtiyar karein.
Yeh adab aur ihtiyaat humare Jumma ke namaz ko maqbool banate hain. Khutba ko sirf ek formal stage ka hissa na samjhein, balke usse deen ki rooh aur Jumma ke fard ka ahem hissa samjhein.
