Quran Shareef Kitne Tariqe Se Padha Jata Hai? – Mukammal Tafseel
Quran Shareef Allah ka paigham hai jo Hazrat Jibrail (علیہ السلام) ke zariye Rasoolullah ﷺ par naazil hua. Ye Quran alag-alag Qiraat (قراءات) yaani padhne ke tareeqon me hifz aur tilawat kiya jata hai. Qirat ke mukhtalif lehje, talafuz aur tajweed ke tareeqe hote hain, lekin ma'ni (meaning) sab ka ek hi hota hai.
Qirat Kya Hai?
Qirat ka matlab hai Quran ko mukhtalif tareeqon se padhna, jisme lafzon ka talafuz aur makhraj (huruf ki adaigi) thodi mukhtalif hoti hai. Ye mukhtalif tareeqe Rasoolullah ﷺ se Sahaba tak, phir Tabe’een aur Ulema tak silsile se manqool hain.
Hadith me aata hai:
"Quran ko 7 hurufon (tariqe) par nazil kiya gaya hai, tum jo bhi usme se asaan lage, us par amal karo۔" (Bukhari)
Quran Shareef Padhne Ke 10 Ma’roof Tareeqe (Qirat)
Islamic ulema ne 10 ma’roof qirat ko tasleem kiya hai, jinme se 7 mashhoor aur 3 mazeed hain.
1. Sab‘a Qirat (Saat Mashhoor Qirat)
Ye 7 qirat sabse zyada mashhoor hain aur inka silsila Sahaba aur Rasoolullah ﷺ tak jata hai:
- Qirat-e-Naafi' (Riwayat Warsh, Qalun) – Madina Shareef, Algeria, Morocco, Sudan, Tunisia me mashhoor hai.
- Qirat-e-Ibn-e-Kaseer (Riwayat Al-Bazzi, Qunbul) – Makkah Shareef me zyada padhi jati hai.
- Qirat-e-Abu Amr (Riwayat Ad-Duri, As-Susi) – Basra, Yemen, Sudan me mashhoor hai.
- Qirat-e-Ibn-e-Aamir (Riwayat Hisham, Ibn Zakwan) – Shaam (Syria, Jordan, Lebanon, Palestine) me mashhoor hai.
- Qirat-e-Asim (Riwayat Hafs, Shu'bah) – Pakistan, India, Bangladesh, Saudi Arabia, Turkey me sabse zyada mashhoor hai.
- Qirat-e-Hamzah (Riwayat Khalaf, Khallad) – Kufa (Iraq) me zyada padhi jati hai.
- Qirat-e-Kisai (Riwayat Ad-Duri, Abu Harith) – Iraq, Yemen me mashhoor hai.
2. Asharah Qirat (10 Mukammal Qirat)
In 7 qirat ke ilawa 3 mazeed qirat bhi hain jo mukhtalif sanad se manqool hain:
- Qirat-e-Abu Jafar (Riwayat Ibn Wardan, Ibn Jammaz) – Madina Shareef me mashhoor hai.
- Qirat-e-Yaqoob (Riwayat Ruways, Ruhal) – Basra (Iraq) me zyada padhi jati hai.
- Qirat-e-Khalaf (Riwayat Ishaq, Idris) – Kufa (Iraq) me mashhoor hai.
Qirat Ke Farq Aur Tareeqe
Har qirat ka mukhtalif lehja aur talafuz hota hai. Niche kuch misaal di ja rahi hain:
1. Qirat-e-Asim (Riwayat Hafs)
Ye sabse zyada mashhoor tareeqa hai jo Pakistan, India, Bangladesh, Saudi Arabia, aur Turkey me padha jata hai. Isme tajweed ki ahmiyat zyada hoti hai aur alif, madd, aur ghunna ko mukammal ada kiya jata hai.
Misal:
"مَالِكِ يَوْمِ الدِّينِ" (Surah Fatiha, Ayat 4)
- Hafs me: "Maliki" ka "Ma" bilkul clear hota hai.
2. Qirat-e-Warsh (Riwayat Warsh)
Ye Madina Shareef, Algeria, Morocco, Tunisia me aam hai. Is qirat me imala aur mad (khichav) zyada hota hai.
Misal:
"مَالِكِ يَوْمِ الدِّينِ"
- Warsh me: "Maliki" ki jagah "Maleki" padha jata hai, jabki Hafs me "Maliki".
3. Qirat-e-Naafi' (Riwayat Qalun)
Ye Madina Shareef aur Libya me aam hai. Yeh Warsh se milta julta hai lekin zyada smooth aur soft pronunciation hota hai.
4. Qirat-e-Ibn-e-Kaseer (Riwayat Al-Bazzi)
Ye Makkah Shareef me mashhoor hai. Is qirat me lafzon ka talafuz bilkul mukhtalif hota hai.
5. Qirat-e-Abu Amr
Isme harf ka ikhtilaf aur tajweed ka ikhtiyar diya jata hai. Ye Basra, Yemen, aur Sudan me mashhoor hai.
6. Qirat-e-Ibn-e-Aamir
Ye Shaam (Syria, Jordan, Lebanon, Palestine) me zyada padhi jati hai. Is qirat me kuch lafzon me farq hota hai jo tajweed ka ikhtiyar dete hain.
7. Qirat-e-Kisai
Ye Iraq me mashhoor hai aur isme makhraj ka farq zyada hota hai.
Mukhtalif Qirat Ka Tareeqa Aur Faida
- Qirat-e-Asim (Riwayat Hafs) sabse zyada aam hai, jo Pakistan aur India ke ilawa Saudi Arabia aur Turkey me bhi zyada istemal hota hai.
- Qirat-e-Warsh ka tareeqa Madina Shareef aur Morocco me zyada mashhoor hai, jisme lafzon ka padhne ka tareeqa thoda soft aur khichav wala hota hai.
- Qirat-e-Ibn-e-Kaseer ka tareeqa Makkah Shareef me padha jata hai, jo aaj bhi duniya bhar me mashhoor hai.
- Har qirat me lafzon ka talafuz, makhraj, aur ghunna ka tareeqa alag hota hai, lekin ma'ni sab mein bilkul wahi rehta hai.
Nateejah
Zer ko "e" padhna ya "i" padhna,
Pesh ko "o" padhna ya "u" padhna,
Ye alag-alag Qiraat (tilawat ki styles) ke mutabiq sahi hai.
Lekin huruf ko sahi tareeke se ada karna behad zaroori hai.
Jaise:
- ح aur ه
- ج, ذ, ظ, ز
- ط aur ت
- ق aur ك
- س, ش, ص, ث
- ض aur د
Agar aap in Huruf ko sahi se ada karte hain, to ye bohot achi baat hai.
Lekin agar sahi se ada nahi kar pa rahe hain, to YouTube par kai Ulama ke videos available hain.
3D animation ke saath thoda practice karenge, to InshaAllah aap in huruf ko sahi se padhne lagenge.
No comments:
Post a Comment